Lauren Etxepare

Matxalen Etxebarria 

Etxebizitza-eraikinen itxituren eta eraikinen karakterizazio eta neurketa zientifikoan oinarritzen den proiektua da hau, hiru urtez, Euskal Autonomia Erkidegoko hiru lurraldeetan eta lurralde historiko bakoitzeko garai eta eraikuntza-tipo jakin bati dagozkion ereduak ikertzeko proiektua, alegia. Hiru urte, hiru lurralde eta hiru eraikuntza-tipo hautatuta, beraz, 2018-2019koa lehenengo neurketa kanpaina baino ez da, hau da, XVII eta XVIII. mendeetako Bizkaiko (Lea Ibarra) baserrien portaera higrotermiko pasiboa neurtuko duena. 

Honela beraz, lehenengo neurketa kanpainakoak diren baserriekin hasita, multzo egokia osatzen dute, itxituren eraikuntza-ezaugarriek barne-giroan zenbat eragiten duten ikertzeko, eta etxebizitzak mendeetan zehar bizi izandako eboluzioak konfortean nola eragin duen jakiteko, batzuen eta besteen arteko aldeak zenbatesteko bidea emanez. 

Lehenengo kanpainarako Lea Ibarrako baserri bi aukeratu dira, Munitibar-Arbatzegi- Gerrikaitzen kokatutako Urionabarrenetxea (XVII. mendekoa) eta Barrutieta (XVIII. mendekoa) hain zuzen ere. Lehenengoak berpizkunde garaiko eraikuntza ezaugarriak ditu, eta bigarrenak, aldiz, barrokokoak. Hortaz, eraikuntza-tipo bati erantzuten badiote ere, euren itxitura- elementuak berariazko teknika baten arabera eta material jakin batzuekin altxatutakoak dira (ikus eranskina). Neurketei esker lortutako datuak bai elkarren artean baita datu teorikoekin konparatu ahal izateko ere, tamaina, forma eta orientazio berdintsuko gune termiko bina hautatu dira. Gune hauetako bakoitzeko itxitura-hormen transmitantzia neurtu (bina fatxada- puntu) eta barne-giroko (bina gela) datu higrotermikoak bildu dira orain artean, eta hala jarraituko dute 2019ko irailera arte, orduan izango bait da emaitzen fidagarritasuna aztertzeko unea.